Mat 28 | GbrGAW | STEP | N Ladi-wyi labmi yi, Maryamu Magadaliya ɓedo n Maryamu de yi ɓalo vingwo aba.

Matthew 28

Wo La Lakala

1 N Ladi-wyi labmi yi, Maryamu Magadaliya ɓedo n Maryamu de yi ɓalo vingwo aba.

2 Nsagmanyi yi, ekni a shan-shan, ntu ge malaika Dagayi nya ɓo gmi ʼshe wa ɓe wa kpe kuta ya, wa sase tu ko. 3 Ewa wyeba bmina ngye gma bmiya-bmiya yi. Ewa je n wu buibui yi pau. 4 Aza n ɓa ɓo zhi ɓai gu nyi, ɓa vin shi ɓa ɓo gye wo, ɓa miya zhi ɓa ku zun-fi.

5 Malaika wa da ɓo na nyikoza yi, “Fye to wo dna m. Mi kpe lo ge fye Zan Yesu nu shin, n na ɓo zun wo du nyi. 6 Ama wo to lo ya m, Wo la wye-wyei je bwa shi wo ɓo da nyi. Fye lo ɓe fya gye aba Wo ɓo wan gye shi. 7 Sai fye lo wolo-wolo fye gna wo bara ge wo la laka vingwo, Woi du Galili wo gye ɓa bwai. Nya nu ma gna fye.”

8 Anyiko-za ɓa kun n siyi n vingwo, odnai wa ɓa, ai gwo ɓa da, ɓa lo ntu ge ɓo ga abara nabari shi malaika gna ɓa. 9 Shi ɓa ɓo lo ɓai busi, nsagma nyi ɓa gye Yesu gni nɓa bye. Wa ciɓa ge, “Sanu fyei” Ɓa lo ɓa ya zhi n wa bye ɓai wan Wa pita, ɓa ga wo mwa-mwa.

10 Yesu wa gna ɓa ge “Fye to zhin dna won, Fye lo fye gna Mazaje ge ɓa lo Galili wolo-wolo ɓa shegun Mi ɓo.”

11 Bai filo zan mi ɓai lo zhimi, azaho na duwa nyakun guyi mi wato a yan-sanda, n ɓa ɓo gu vingwo nyi, ɓa lo a pirist dnagmai aba ɓa wu ɓa lafiya ɓo ko ku zhin. 12 – 13 Ɓa yezhi n Yahudawayi atukoda jei ɓa zhin shaula ge ɓa ga a yan-sanda agyiwye, to ɓa da ge Yesu la laka nun, ama ɓa gna ge, esa ɓa ɓei ku wan-gye n sukoyi, Owa, bara ɓe ɓa wyi wo nahi. 14 A Yahudawayi a tukoda gna, “Ndei gwomna wo ce, yi ɓa gni agni ga fye har to wa zhin fye nyaho m.”

15 Ayan-sanda agyiwye gwo, ɓa ga nabari shi a ɓo gna ɓa ge ɓa da. Oɓa nabari kwa gnami fyi na Yahudawayi aba, har naiye, ɓa gaiciya ga lo lonu.

16 Abara awocei-gmanyi, ɓa lo Galili, ɓai lo ʼpe aba Yesu ɓo gna ɓa ge ɓa ɓei shegun wo. 17 N bwayi, ɓa ku gye Wo wye, ɓa ga Wo mwamwa, ama azaho n ɓa mi, to ɓa ga gaiciya ge Yesu nu gni m.

18 Yesu wa gna wo abara, “Iko vinya n ʼshe ɓedo na nyi yi, a la ga Mi. 19 Ntu ce nu fye lo fye zan abara do shin nabye vinya, fya zhin ɓa batisma dna Dada ʼye, n Nugun yi, n Zafun Gyi-gyi-yi. 20 Fye wu ɓa ɓa vi awyidna n Mi ku ga fye nyi, fye ku kpe ge Mi gnisun lo fyei ci-ci har anyi zo sa.”